IGARRITZ: euskarazko testu iragarpenerako web ingurune egokitua

Motrizitate mugatua duten ikasleek, garun paralisi batek sorturiko muga dutenek adibidez, tresna egokituak izaten dituzte testuak idazteko; esaterako, begiradaren jarraipeneko hardware bat, zeinarekin ordenagailuan letrak aukeratu eta sistemak iragartzen dituen hitzak aukeratu daitezkeen. Sistema hauek euskaraz idazteko baliabideak izaten dituzte, edo euskarazko hitz zerrendak sartuta iragarpenak aukeratzeko abagunea ematen dute. Edozein testu iragarpenen xedea da testua idazteko esfortzua murriztea, baita testu luzeagoak azkarrago idatzi ahal izatea ere. Irisarekin idaztea hamar atzamarrekin idaztea baino geldoagoa eta nekezagoa da; horrez gain, testu iragarpenererako tresnak euskaraz beste hizkuntzetan baino okerrago ibiltzen dira, eta sarritan nekez laguntzen dute. Lan honen helburua da euskarazko testu iragarpenerako web ingurune egokitu bat egitea, adimen artifizialeko teknikak erabiliz. Horretarako, euskarazko hizkuntza-ereduetan oinarrituriko web interfazea sortu dugu, IGARRITZ izenekoa. Sortutako testu iragarleak Transformer arkitektura erabiltzen du eta HiTZ/roberta-eus-euscrawl-base-cased hizkuntza-eredua berrentrenatu da hezkuntzarako corpusarekin (ikasleen testuak, Gizapedia entziklopedia eta hezkuntzari buruzko testuak: Wikipediakoak eta Berriakoak). Bukatzeko, tresna ebaluatu eta egun eskura dagoen beste sistema batekin konparatu dugu, garun paralisia duen Bigarren Hezkuntzako ikasle batek ekoitzitako testuekin. Emaitzen arabera, IGARRITZek euskarazko testu iragarpena hobetu egiten du eta begiradarekin idazten duen pertsonak berak askoz errazago eta gehiago idazten duela adierazi du. Horrez gain, ebaluazio automatikoa egin dugu, eta hor ere emaitzak hobetzea lortu dugu.